టీటీడీ ప్రాణదాన ట్రస్ట్ కు భారీ విరాళం

తిరుమల తిరుపతి దేవస్థానం (టీటీడీ) నిర్వహిస్తున్న శ్రీ వేంకటేశ్వర ప్రాణదాన ట్రస్టుకు భారీ విరాళం అందింది. కోల్‎కతాకు చెందిన హిమాద్రి ఫౌండేషన్ సంస్థ రూ. 2.50 కోట్లను విరాళంగా అందజేసింది. తిరుమలలోని ఛైర్మన్ క్యాంపు కార్యాలయంలో నిన్న ఈ కార్యక్రమం జరిగింది.

హిమాద్రి ఫౌండేషన్ ట్రస్టీ అనురాగ్ చౌదరి, ఈ విరాళానికి సంబంధించిన రూ. 2.50 కోట్ల డిమాండ్ డ్రాఫ్ట్‌ (డీడీ)ను టీటీడీ ఛైర్మన్ బీఆర్ నాయుడుకు అందజేశారు. ఈ సందర్భంగా ఛైర్మన్ మాట్లాడుతూ దాతలకు కృతజ్ఞతలు తెలిపారు. "పేద రోగులకు నాణ్యమైన వైద్య సేవలు అందించేందుకు ఈ నిధులు ఎంతో ఉపయుక్తమవుతాయని" ఆయన వివరించారు.

ప్రాణాపాయ స్థితిలో ఉన్న పేద రోగులకు ఉచితంగా మెరుగైన వైద్యం అందించేందుకు టీటీడీ ఈ ట్రస్టును నిర్వహిస్తున్న విషయం తెలిసిందే. ఈ కార్యక్రమంలో టీటీడీ బోర్డు సభ్యులు పనబాక లక్ష్మి, సదాశివరావు,  జంగా కృష్ణమూర్తి, శాప్ ఛైర్మన్ రవినాయుడు తదితరులు పాల్గొన్నారు.